Política de privacidade

Responsable

Marcos Núñez Pérez

NIF

35631698Y

Correo

marcos@mediacionmnp.es

Actividade

Mediación escolar, familiar e civil

Non hai delegado de protección de datos designado, porque esta actividade non figura entre as que o esixen o artigo 37 do Regulamento nin o artigo 34 da Lei Orgánica 3/2018. As consultas sobre protección de datos atédense nese mesmo enderezo de correo.

Unicamente o que vostede envíe se escribe ao correo de contacto: o seu enderezo e o que conte na mensaxe. A web non ten formulario e non recolle nada por detrás.

Eses datos utilízanse para ler a súa mensaxe e respondela. Non se empregan para enviar publicidade, non se elaboran perfís con eles e non se toma ningunha decisión automatizada.

A base xurídica é a aplicación de medidas precontractuais por petición súa, prevista no artigo 6.1.b do Regulamento: vostede escribe para saber se este servizo lle serve, e responderlle forma parte desa conversa previa.

A partir de aí ábrese un expediente, e o que se trata é doutra natureza. Antes de comezar entrégase por escrito unha información máis detallada ca esta, que se asina xunto coa acta da sesión constitutiva.

• Que datos

  Os identificativos e de contacto de cada persoa, e a información sobre o conflito que vostedes decidan achegar: situación familiar, económica ou contractual, documentos que enmarcan o asunto e os acordos que se vaian alcanzando.

• Con que base

  A execución do contrato de mediación, do artigo 6.1.b, e o cumprimento das obrigas que impón a Lei 5/2012 en canto ás actas e á documentación do procedemento, do artigo 6.1.c.

• As categorías especiais

  Nunha mediación familiar poden aparecer datos de saúde, e ás veces doutras materias que o artigo 9 do Regulamento protexe de forma reforzada. Para tratalos fai falta o seu consentimento explícito, que se recolle por escrito, nunha caixa propia e separada, na acta da sesión constitutiva. Pode retiralo cando queira, con efectos cara a adiante.

• A facturación

  Os datos necesarios para emitir a factura trátanse por obriga legal e seguen o prazo que marca a normativa mercantil e fiscal, con independencia do que pase co expediente.

Nun conflito familiar é inevitable que apareza información sobre persoas que non están sentadas na mesa: fillos e fillas, unha nova parella, un familiar ao que hai que coidar.

Cando eses datos non os facilita a persoa á que se refiren, o artigo 14 do Regulamento obriga a informala no prazo dun mes ou na primeira comunicación que se teña con ela. Á outra persoa infórmaselle na súa propia sesión inicial.

Por iso pídeselle a cada persoa que achegue só o necesario para o asunto.

Os fillos e fillas menores de idade non participan nas sesións. Fálase dos seus horarios, das súas rutinas e do que necesitan, pero non se lles pide que escollan nin que opinen sobre o conflito, e os seus datos achégaos quen exerce a patria potestade.

No traballo con centros educativos a situación é distinta: alí o responsable dos datos do alumnado é o centro, non o mediador, que actúa por conta súa e baixo o contrato que ambos asinan. O traballo organízase con identificadores en lugar de nomes sempre que é posible.

Nun punto, a mediación é máis estrita ca a normativa de protección de datos.

O artigo 9 da Lei 5/2012 impón un deber de confidencialidade que impide achegar nun xuízo posterior o que xurdise na mediación, e que só decae en dous supostos: que ambas as persoas o dispensen expresamente e por escrito, ou que o pida un xuíz da orde penal mediante resolución motivada.

Por iso unha persoa non pode pedir copia do expediente completo para utilizala contra a outra, nin sequera invocando o seu dereito de acceso. O artigo 15.4 do Regulamento respáldao, porque ese dereito non pode afectar negativamente os dereitos de terceiros.

O que si se lle entrega a quen o pida son os documentos que esa persoa asinou, a súa acta e o seu acordo, e os datos que se refiren a ela.

• Consulta que non chega a nada

  Bórrase ao ano como moito. Se na primeira conversa se ve que o asunto non é mediable, bórrase ao pechala.

• Expediente de mediación

  Cinco anos desde o peche, que é o prazo de prescrición das accións persoais do artigo 1964.2 do Código civil e, polo tanto, o tempo durante o cal pode haber que responder da intervención.

• Notas de traballo do mediador

  Destrúense ao pechar o procedemento. Non hai obriga de conservalas e a súa existencia só engade risco.

• Facturación

  Seis anos, polo prazo que impón a normativa mercantil.

Unha vez ao ano revísase o almacenado e bórrase o que vencese.

Os datos non se lle ceden a ninguén. Si interveñen algúns provedores que prestan un servizo técnico e que, polo tanto, acceden a eles. Todos teñen subscrito o contrato de encargo do tratamento que esixe o artigo 28 do Regulamento, que os obriga a seguir instrucións, gardar confidencialidade e non usar os datos para nada seu.

• Netlify

  Aloxa esta web. Empresa estadounidense.

• IONOS Cloud, S.L.U.

  Aloxa a caixa de correo na que se reciben as mensaxes e desde a que se responde.

• Infomaniak Network SA

  Presta o servizo de videochamada co que se desenvolven as sesións, que non se gravan.

Á marxe diso, os datos só se lle entregarían a unha autoridade se unha norma o esixise, e nos termos exactos do que se pedise.

A caixa de correo está nunha empresa española, co tratamento dentro do Espazo Económico Europeo agás que a prestación do servizo esixa outra cousa, en cuxo caso se aplican as garantías dos artigos 44 e seguintes do Regulamento.

O servizo de videochamada aloxa os datos en Suíza, país ao que a Comisión Europea lle recoñece un nivel de protección axeitado, de modo que enviar datos alí non require garantías adicionais.

Onde si hai transferencia internacional é no aloxamento desta web, que corresponde a unha empresa estadounidense, coas garantías que o Regulamento esixe. Iso afecta ás páxinas que vostede visita, non ao que escriba ao correo nin ao contido dunha mediación, que non pasan por aí.

Esta web non instala cookies, non usa ferramentas de analítica e non hai ningún sistema que siga a súa navegación. Por iso non atopará ningún aviso de cookies: non habería nada que consentir.

As tipografías están aloxadas no propio sitio, así que o seu navegador non fai peticións a servidores de terceiros ao cargar as páxinas.

Só se gardan preferencias de lectura, e non mediante cookies. Se cambia entre o tema claro e o escuro, ou axusta algunha opción do panel de accesibilidade, esa escolla gárdase no almacenamento local do seu navegador para non volver preguntarlla. Eses datos non saen do seu equipo, non permiten identificalo e desaparecen ao limpar os datos do navegador.

Os equipos onde se traballa están cifrados e protexidos con contrasinal, o acceso aos servizos leva verificación en dous pasos e as copias de seguridade están cifradas. A documentación con datos do procedemento non se envía como anexo aberto.

As sesións non se gravan. Cando fai falta falar cunha persoa por separado, faise nunha sala independente, e o que se trate alí non se traslada á outra sen autorización.

Se a pesar de todo se producise unha violación de seguridade que afectase aos seus datos, comunicaríaselle á Axencia Española de Protección de Datos no prazo de setenta e dúas horas que fixa o artigo 33 do Regulamento, e a vostede directamente se o risco fose alto.

Pode solicitar en calquera momento o acceso aos seus datos, a súa rectificación, a súa supresión, a limitación do seu tratamento, a súa entrega nun formato lexible por unha máquina ou a oposición a que se traten. E, cando o tratamento se base no seu consentimento, retiralo sen que iso afecte ao feito ata entón.

Abonda con escribir a marcos@mediacionmnp.es indicando o que desexa. A resposta emítese no prazo dun mes, que se pode prorrogar outros dous se a solicitude é complexa, avisando diso.

Hai dous límites: o dereito de acceso non alcanza os datos da outra persoa, polo explicado máis arriba, e a supresión non se pode aplicar a documentos que unha norma obriga a conservar, como as facturas ou as actas, ata que venza o seu prazo.

Se considera que a súa petición non foi ben atendida, pode reclamar ante a Axencia Española de Protección de Datos, que é a autoridade de control competente.